Канадын Калгари хотноо энэ сарын 16-20-ны өдрүүдэд зохион байгуулагдах Дэлхийн цомын нормтивыг биелүүлэх цуврал тэмцээний төгсгөлийн тэмцээнд оролцохоор  ОУХМ Д.Дэлгэрмаа  эх орноосоо  дасгалжуулагчгүйгээр  мордсон байна. 

Д.Дэлгэрмаа нь энэхүү цуврал тэмцээнд оролцсоноор Монгол Улсын рекордыг шинэчлэн тогтоохоос  гадна ирэх өвлийн Дэлхийн цомын аварга шалгаруулах тэмцээнд оролцох эрх олж авах зорилго өвөртлөсөн аж.  

Харамсалтай нь МТХ түүнийг болон дасгалгжуулагчийг нь  дэмжихээс татгалзсан тул тэрбээр  Спорт хөгжлийн төвд хандан замын зардлаа  шийдүүлж,  үлдсэн бүх зардлаа өөрөө дааж байгаа гэнэ. Гэтэл МТХ-ны үүрэг гүйцэтгэгч Д.Болормаа уг тэмцээний хаалтын арга хэмжээг  үзэхээр хүүгээ дагуулан  18-ны өдөр Калгариг зорих гэж буйд тэшүүрчид ихэд бухимдан “Ийм ерөнхийлөгчийн үүрэг гүйцэтгэгчтэй байснаас ээлжжит бус хуралдааныг зарлан хуралдуулж, огцруулах тухай асуудлыг хэлэлцэх цаг болжээ” хэмээж буй юм байх.  

Дашрамд хэлэхэд, дээрх тэмцээнд Залуучуудын өвлийн олимпоос анхны алтан медалийг эх орондоо авчирсан  ОУХМ Б.Сумъяа  оролцохоор бэлтгэл сургуулилтаа хангаж байсан боловч  МТХ виз мэдүүлэхэд нь хориг тавьсаар цагийг нь тулгаж орхисон тул боломжгүй болжээ. 

Уг нь тэрбээр олимпод явахаасаа өмнө холбоондоо виз мэдүүлэхтэй холбоотой материалуудаа бүрдүүлж өгөөд явсан атал  МТХ-ны нарийн бичгийн даргын үүрэг гүйцэтгэгч М.Нармандахын хариуцлагагүйгээс болж,  Дэлхийн цомын норматив биелүүлэх тэмцээнд оролцож чадалгүй үлдсэн байна.

Х.Норжин